Böyük mərcəyi-təqlid müctəhidlərindən olan Ayətullah Safi Gülpayiqani bildirib ki, azadlıqsevənlər və vicdanlılar Amerikanın din əleyhinə rəftarları qarşısında durmalıdır. Verilən məlumata görə, o, həftənin 4-cü günü tələbə və elm adamları ilə görüşündə Əziz İslam Peyğəmbərinə (s) təhqir ehtiva edən filmi qınayaraq bildirib: "Dünyanın azadlıq tələb edən insanlarından, xüsusən də elm ocaqlarından, müxtəlif dinlərə məxsus böyük universitetlərdən, alimlərdən istəyimiz budur ki, belə iyrənc şəkildə din, elm və məntiq əleyhinə olan bu davranışları pisləsinlər və özlərinin böyük elmi vəzifələrinə və vicdanlarına əməl etsinlər”.Daha sonra Ayətullah Safi Gülpayiqani İslam düşmənlərinin yeni mübarizə metoduna əl atdıqlarına işarə edərək buyurub ki, İslam əleyhinə, Quran əleyhinə bu və bənzəri kimi davranışlar hələ İslamın ilk zühur etdiyi vaxtlardan olub. "Bu barədə Qurani-Kərim də bizə anladır. Amma belələri heç vaxt müvəffəq olmayıblar və olmayacaqlar da”.
O, İslamın dünyada sürətlə yayılmasına işarə edərək buyurur: "Dünyada həqiqət axtaran, azadlıq tələb edən insanlar, xüsusən də Amerikada və Avropada cavanlar İslam dininə yönəlirlər. Bu da təbii ki, belə qüvvələri narahat edir”.
|