 Allah Təalanın rəhmətinə və rizvanına qovuşmaq üçün müxtəlif yolar vardır ki, hədislərdə behişt qapıları adını almışdır. Onlardan biri də cihaddır. Həqiqətən cihad behişt qapılarından biridir. Allah bu qapını xüsusi bəndələrinin üzünə açar.
İmam Sadiq (ə) buyurur: "Behiştdə bir qapı var, adı "Babul-mücahidin”dir. Onlar bu qapıya tərəf hərəkət edərlər. Qapını qarşılarında açarlar. Qılınclarını bellərinə taxmış vəziyyətdə. Bu, o haldadır ki, başqa insanlar hesab vermək üçün dayanıblar. Hesabın intizarındadırlar. Mələklər onları təbrik edərlər”.
Allahın ancaq xüsusi bəndələri bu yoldan xalis niyyətlə keçərlər.
Başqaları isə çirkin niyyətlə, qənimət əldə etmək üçün bu yola qədəm basarlar, ancaq sonuna qədər getməzlər. Bu xalis niyyətli xüsusi bəndələrdir ki, nəfləri ilə cihadın da, əsğər cihadının da bütün çətinliklərini səbirlə arxada qoyarlar.
İmam Əli (ə) belə buyurur: "Haqq yolunu gedən dostlarım haradadır? Əmmar haradadır? Zulşəhadəteyn haradadır?” Şübhəsiz ki, bu cür çağırması onu göstərir ki, bu insanlar Həzrətin xüsusi yaxınları idi.
Həzrət bu sözləri Siffeyn döyüşündən sonra demişdi. Əmmarı yada salır. O, Siffeyn döyüşünün iftixarlı şəhidi idi.
Həzrət Peyğəmbər (s) onun haqqında buyurmuşdu: "Əmmar haqladır və haqq Əmmarladır”. Xəzimə ibni Sabitdən belə bəhs edir: "Siffeyn döyüşünün vəfadar şəhidi idi”. İbni Əbi Leyla deyir: "Siffeyndə idim, bir ağ saqqallı və başında əmmaməsi olan bir kişi gördüm. Üzündə niqab var idi, ancaq saqqalının aşağısı görünürdü. Çox yaxşı vuruşurdu, dedim: "Ey Şeyx! Müsəlmanlarla vuruşursan”. Niqabı üzündən çıxardır və deyir: "Mən Xəziməyəm. Allahın Peyğəmbərindən (s) eşitmişəm ki, buyurub: Əli ilə vuruşan hər kəslə vuruş”.
İmam Əli (ə) bu şəhidləri yada salandan sonra uzun müddət ağlamış və sonra demişdir: "Qardaşlarım Quran oxuyar və onu hifz etməkdə səy göstərərdilər, vacibi bərpa edər, sünnəti dirildərdilər, cihada çağırılardılar və qəbul edərdilər. Rəhbərlərinə etimad edib, onun ardınca gedərdilər”.
Bu kəlamlarla İmam (ə) xüsusi bəndələrin xüsusiyyətlərini bir-bir saymışdır. İslam hökmlərinə və Qurana bağlı idilər. İlahi vacibatları yerinə yetirərdilər. Allah yolunda cihad edər və İlahi sünnətləri dirçəldər, bidətlərlə mübarizə aparar, vilayəti qəbul edər və Vəliyə itaət edərdilər - bunların hamısı xüsusi bəndələrin xüsusiyyətləridir. Mövla bu bəndələrdən fərqli olan müsəlmanlar haqqında isə belə buyurur: "Kaş, sizi tanımazdım. Sizi nə vaxt cihada çağırdım - havanın istisini və soyuğunu bəhanə etdiniz. Allah sizi öldürsün ki, qəlbimi qanlı etdiniz”.
|
