 Ölüm bəzi insanlar üçün bir arzudur və bəzi insanlar üçün isə uzun görünən bir xəyaldır. O kəslərin ki, həyatları çətinlik və müsibətlə doludur, bu cür insanlar ölüm arzusunda olurlar. Ölümü hər bir problemin çarəsi kimi görürlər. Bəs bu arzunu Peyğəmbərimiz (s) necə qarşılayırdı?
Heç bir arif və aqil insan ölümü arzulamaz. O kəslər ki, həyat çətinliklərindən ölümü arzulayırlar, bilmədilər ki, buna görə onları o bir dünyada da çətin hesab gözləyir. Çünki bu həyatda olan zaman Allaha ümidlərini itirmiş və ölümlə rahatlıq tapmaq istəmişdilər.
Allah yəhudilərə xitab edərək, buyurur: "De: «Ey yəhudilər, əgər belə hesab edirsinizsə ki, başqa insanlar deyil, siz Allah dostlarısınız, əgər düz danışırsınızsa (onda Allahdan) ölüm diləyin (ki, dostunuzun rəhmət və nemətinə nail olasınız,)». ("Cümə” 6).
Bu ayədən görmək olur ki, ancaq mömin və təqvalı olanlar ölümə kamil hazır olarlar. O insanlar ölümdən qorxmaz ki, ona hazır olarlar.
Həzrət Peyğəmbər (s) bir gün xəstə bir müsəlmanın zirayətinə gedir və görür ki, xəstə ağrının şiddətindən ölüm arzulayır. Ona buyurur: "Ölümü arzulama, çünki əgər sən yaxşı insan və yaxşı əməl sahibi olsan, ömrünün uzun olması ilə bu yaxşı əməllərin sayını artırarsan. Əgər pis insansansa, ölümünün təxirə düşməsi ilə qınağa düçar olarsan”. (yəni, ya tövbə edərsən, ya da günahlarının kəffarəsini verərsən).
Həzrət (s) başqa bir hədisdə buyurur: "Niyə ölüm arzulayırsan? Əgər behişt əhlisənsə, qalmağın daha yaxşıdır. (Daha çox yaxşı əməl görərsən). Ancaq əgər atəş əhlisənsə, cəhənnəmə getmək üçün niyə tələsirsən?”.
Həzrət Peyğəmbər (s) yenə buyurur: "Sizlərdən heç biri ona çatan zərərə görə ölümü arzulamasın. Əgər bu işdə çarəsiz olsa, desin: "Allahım! O zamana qədər ki, həyat mənim üçün yaxşıdır, məni sağ saxla. O zaman ki, ölüm mənim üçün yaxşı olar, o zaman məni öldür””.
İmam Kazım (ə) ölümü arzulayan bir kişiyə belə buyurur: "Səninlə Allah arasında qohumluq bağı vardırmı ki, ona görə sənə kömək etsin? Deyir: Yox. Buyurdu: Pis əməllərindən çox olan yaxşı əməllərini özündən qabaq göndərmisən? Deyir: Yox. Onda bu zaman əbədi həlakəti arzu etmiş olarsan!”.
Ey insan! Bu dünyada ölümdən qəti bir şey yoxdur. Hər bir canlı bir gün öləcəkdir. Bu, qəti olacaq bir şey üçün niyə arzu edirsiniz? Biz gərək həyatımızın qədrini bilək və Allahdan uzun ömür diləyək ki, daha çox yaxşı əməllərə sahib ola bilək. Hər saniyə bizim ömrümüzdən gedir, bunun şahidi olan bir insan gərək onu hədər verməsin.
Həyatda çətinliklər ola bilər. Ancaq bu çətinliklər bir gün yerini rahatlığa verəcəkdir. Çünki çətin ömrün müddəti az olar. Allah Təala da buyurur: "Həqiqətən, çətinlikdən sonra asanlıq olar”. Allahın bu vədinə inanaq və mənası olmayan arzulardan uzaq olaq.
İmam Əli (ə) buyurur: "Ölümə hazır olun. Çünki ölüm sizin başınızın üstündə kölgə salmışdır. O insanlardan olun ki, başlarının üstündə fəryad çəkilmiş və oyadılmışdılar. Onlar bilmişdilər ki, dünya onların sarayı deyildir. Ona görə də onu (o biri dünya ) ilə əvəz etmişdilər”.
Sübhan Allahdan diləyirik ki, bizi o möminlərdən qərar versin ki, hər bir dünya neməti bizi məst etməsin və heç bir hədəf bizi Allahdan uzaqlaşdırmasın. Öləndən sonra peşman olanlardan və həsrət çəkənlərdən etməsin. Amin!
|
